ዝኣደሙ ወተሃደራት ኤርትራ፡ ንቤት ጽሕፈት ሚኒስትሪ ዜና ኣብ ትሕቲ ቍጽጽሮም ኣእትዮም

ዝኣደሙ ወተሃደራት ኤርትራ፡ ንቤት ጽሕፈት ሚኒስትሪ ዜና ኣብ ትሕቲ ቍጽጽሮም ኣእትዮም

Last Updated on Monday, 21 January 2013 22:44 Written by ቤት ጽሕፈት ዜና ሰዲህኤ Monday, 21 January 2013 20:21

ብኽልተ ድሩዓት መኻይን ዝተሰነዩ ክሳብ 200 ዝግመቱ ወተሃደራት ኤርትራ፡ ሎሚ ሰኑይ ዕለት 21 ጥሪ 2013 ነቲ ኣብ ፎርቶ ዝርከብ ቤት ጽሕፈት ሚኒስትሪ ዜና ኤርትራ ኣብ ትሕቲ ቍጽጽሮን ከምዘእተውዎ ተሓቢሩ።

እቶም ወተሃደራት ነቶም ኣብኡ ዝጸንሕዎም ሓለፍቲ እቲ ሚኒስትሪ ኣብ ሓደ ውሱን ክፋል ናይ’ቲ ህንጻ ሒዞምዎም ኣለዉ። ኣብ’ዚ ቀረባ እዋን ኣብ’ቲ ሚኒስትሪ ክትሰርሕ ዝተመደበት ኤልሳ ኢሳያስ፡ ጓሉ ንፕረሲደንት ኢሳያስ፡ ካብ’ቶም ኣብ ቍጽጽር ዝውዓሉ ሰራሕተኛታት ምዃና ውን ተገሊጹ።

ጋዜጠኛ ኣስመላሽ ኣብርሃ በቶም ዝኣደሙ ወተሃደራት ተገዲዱ፡ ቅዋም ኣብ ግብሪ ክውዕል ኢዩ፣ ናይ ፖለቲካን ስግረ ዶብ እሱራትን ክፍትሑ ኢዮም ዝብል መግለጺ ብተለቪዥን ድሕሪ ምሃቡ፡ ኤሪቲቪ፡ ድምጺ ሓፋሽ፡ ረድዮ ዛራን ካብ ፈነወ ውጻኢ ኰይነን ምጽንሐን ተፈሊጡ ኣሎ።

ኣብ ኣስመራ ይኹን ወጻኢ ካብ ኣስመራ እቲ ኵነታት ህዱእ ከምዘሎ’ዩ ዝተፈላለዩ ናይ ኤርትራውያንን ወጻእተኛታትን ምንጪታት ክሕብሩ ጸኒሖም።

ድሒሩ ዝመጸ ሓበሬታ፡ ደገፍቲ ናይ’ቲ ስርዓት ዝዀኑ ወተሃደራት፡ ነቶም ኣድመኛታት ኣኽቢቦምዎም ኣለዉ ዝብል ኢዩ። ከምኡ’ውን፡ ኤሪቲቪ ንቡር ፈነወኣ ጀሚራ ኣላ።