ለባም ክጋገስ መራግእቲ ነይገድፍ፡

እዚ መስተዉዓሊ ብሕጊ ዝማሓደር ዝነበረ በሊሕ ህዝቢ፡ ኣብ እምነታቱ ጸንዑ ንኣሽሓት ዓመታት ዘጽነሓልና ሪም ነባሪ‘ዩ ። ወለደታቱ ውጽኢቱ እንታይ ንገብር ከም ዘሎና ንግንዘበዶ ንርደኦዶ ንህሉ…? ናይ ዝሓለፈ ታሪኽን ናይ ሎሚ ወለዶ ታሪኽን ካብ ምንታይ ዝተበገሰ‘ዩ..?፡ እዚ ኹሉ ሸንኮለል ካብ ሕሉፍ ኣሰራርሓና ዘይንማሃር ከይንህሉ ብዓቢ ኣስተብህሎ ምርኣዩ የድሊ። ነዚ ሓብርካ ተሳኒኻ ንምንባር እዚኹሉ ወጠጥ ንምንታይ ኣድለየ።ካብ ሓብርካ ምንባር ዝጥዕም ንላዕሊ ኣሎ ኣይብልን።ግደፉ ንጥዑም ምቁር ክንብል ዘይንበቅዕ ኣይንኹን። ንመሪር መሪር ምባል ኣይኽበደና። ብፍላይ ውልቀ ሰባት፡ ጸጋን ዕድመን ዝተዓደሉ፡ምኽሮምን ተሞኩሮኦምን ከተሓላልፉ ብሓላፍነት ክብገሱ ንጽበ።ብፍላይ ንሕና ኩልና፡ ኣብ ገገዛና ኮይና ተባህለን ተገብረን ክንብል ግዜና ኣይንጸንቅቕ። እጃምና ነበርክት፡ ልዕሊ ህዝብናን ሃገርናን፡እንምነዮን ንብህጎን ኣይክህልወናን‘ዩ። ለባማት ክምስሉ ከለዉ ጥቅሊዒት ትሸኖ ሽንቲ ተመሊሱ ናብቲ ዝሸኖ ኣካል የጠልቅዮን የጭንዎን ይብሉ።

ቀዳሞት ኣቦታትና ኣብ ጉዳይ ምሕደራ ኤርትራ ፈተነታት ኣየጓነፎምን ድዩ…? ኣጓንፍዎም እምበር፡ ንሱ ድማ ኣብ ክልተ ዓበይቲ. ምክፋል ይከኣል፡ እቲ ሓደ ምስ ኢትዮ- ሓብርካ ምንባር ዝብል ሸነኽ ክኸዉን ከሎ፡ እቲ ሓደ ክፋል ድማ ኤርትራ ንኤርትራዉያን ዝብሉ ክልተ ዘይራኸቡ ተጻረርቲ ርእይቶታት ንህዝብና ኣብ ዓሚቕ ፈተነ ኣጥሒሎሞ ነሮም።እቲ ሓቀኛ ራኢ ሒዙ ንፍጹም ናጽነትን ሓርነትን ኤርትራ፡ ዝተበገሰ ወሳኒ ዕላማ ሸነኽ፡ ንመላእ ህዝቡ ወዲቡ ብምቅላስ ንጸላኢ ካብ ሃገሩ ከባርር በቒዑ‘ዩ። ንሃገሩ፡ምስ ሕብረተ ሰብ ዓለም ኣካል ከምትኸዉን ገይሩ። ናይ ቀዳሞት ወለዲ ክብሪ ንሃገሮምን ህዝቦምን ብምዕቃብ ካብ ምብትታን ኣድሒኖሞ።፡ክብሪ ድማ ንሶም ተወንዚፎሞ ።ንሕና ካብዚኣቶም ኢና ተፈጢርና። ወለድና ዘኹርዕ ኣረኣእያን ስራሕን ጅግንነት ዝፈጸሙ ከንሶም፡ ንሕና ደቆም ዘርብሓና ዘይምርኣይና፡ ከምቲ ጅግና ሕማቅ ተወለደ ተዘምተ፡ሕማቅ ጅግና ተወለደ ተቐልተ ከም ዝባሃል ምስላ ፡ ከይኸዉን ዕጫና ደጋግምና ምስትብሃል ከምዘድሊ ኣብ ጉዕዞ ተቃዉሞታት ጉድለታት ክደጋገም ትዕዘብ። (ሓድጊ ጅግና ኩሉጊዜ ሕመረት ኣለዎ)።

ኩሉ ጊዜ ንዝወጹ ንመደባት ኣብ ምትርጓም ዕንቅፋት ከምዘጓንፉ ርዱእ እንዃን እንተኾነ፡ ኣብ ምእላዮም ግን ዉልቀ ሰባት ዓቢ ኣበርኽቶ ኣለዎም ። ንሳቶም ድማ ልቦናን ጽሮትን ዝተዓደሉ እዮም፡ ካብ ቅምን-በቐልን ሓቝንካ ዝወጽእ ጠስሚ ከምዘይርከብ ዘረጋገጹ እዮም። ኣብ ግዝያዊ ረብሓ ዘተኩር ኩሉ፡ እንዳፈለጠ ነቲ መስተዉዓሊ ኣእምሮ ናብ ዘየድሊ መኣዝናት ዝጠምዘዙ እዮም። ከም ዝበሃል እንዳፈለጠ ዘጽቀጠ፡ ሓርማዝ እንተነቅነቖ እዉን ኣይሰምዕን።

ንኣብነት፡ደቂ ሰባት ኣብ ዘየድሊ ጎጽታት እንተተኣልዮም፡ ብመሰረቱ ወዲ ሰብ 100% ዝበሃል ኣብ ዓለምና ዘሎ ኣይኮነን፡ነቶም ሰብ ሞያ ኣብ ናይ ጥዕና መገመቲ ኣገባባት ዝጥቀሙ ከጽንዕዎም ክደልዩ ከለዉ፡ኩሉ ከምዝግበርን መሰል ክህልወካ ከምዝግባእ እንዳምሰሉ፡ ካብቲ ዝፈጸምካዮ፡ፍጻሜታት ወጻኢ እንዳዕለሉ ወጃዕጃዕ የብሉኻ‘ሞ፡እቲ ዝድለ መገምገሚ፡ ናይ ምልእነትካን- ጉድለትካን ዉጺእታዊ ገምጋም የዋህልሉ። ካብቲ ዝሓቱኻን እትምልሶ ኣዋጽኦም ጉድለታት የዋህልሉ መገምገሚካ ድማ እረኽቡ። ናይ ጸጥታ ኣሰራርሐ እዉን ተማሳሳሊ እዩ፡ ኣብቲ ምዕቡል ምሕደራታት ዝወነኑ ሃገራትን ህዝብታትን ።ምስ ምልካዊ ባህሪ ዘለዎ ቅርቢ ፡ ሐቂ ክዛረብ ትጽቢት ዝግበረሉ ኣይኮነን ። ትንዋሕ ትሕጸር ግን ኣታ ሐቂ መናሕሰዪት ከምዘይኮነት ምርዳኣ ተድሊ፡ነበሪት ካብ ምዃን ድሕር ዘይትብል‘ያ። ብዓል ሓደ ከብዱ ድማ ኣብ ናይ ታሪኽ ጓሓፍ እትኽዘን ምዃና ኢና ንሪኢ። ናይ 2011 ኩነታት ምዕዛብ ብቐሊሉ ከረዳኣና ይኽእል፡ ኣበይ ኣለዉ በዓል ሓደ ከብዶም…? ግን ክትበልዓ ዝደለኻ እንስሳ ስማ ኣጸባብቕካ ምብልዐ‘ዩ፡ኣንነት ካበይ ትቦቑል፡ ካብ ዕሽነት፡መጨረሻ ዕሽነት ኸ..? ስዕረት። ነዊሕ ከይተጓዕዝና ካብ ግዜ ኃጸይ ኃይለ ስላሴ ክንማሃር ይቐርበልና።

እቲ ቑኑዕ ምሕደራ ንብዙሓት ደቂ ሰባት ናብ ናይ ምዕብልና ጎደና እናሰሓበ ናብሮኦም እናማሓየሹ፡ንሃገሮም ንህዝቦምን ናብ ብልጹግ ዕብየት እንዳተጓዕዙ ይሕምቦቡ፡ ንቐጻሊ ወለዶ የጣጥሕሉ ንሕማቅ ኣይዕጠቑሉን፡ብጽቡቅ ነገር ግን ቅናቶም መሰረት ንኽኸዉን ኣበርትዖም ይማካኸሩን ይላዘቡን። ካብ ሓድነቶም ተበጊሶም ዘዉጽእዎ ቅዋሞም ንህዝቦምን ንሃገሮምን ኮይኖም ንዝልምኖም ዉጹዕ ህዝቢ ዓለሞም ድማ፡ተቐበልቲ ጋሻ ምዃን ይበቅዑ። ብኹሉ ሸነኻት ምስተን ብልጹጋት ሃገራት ናይ ዕዳጋታት ምልዉዋጥ ብሱልን ጥረን ፍርያት ኽትገብር ተክእሎታት ተጥሪ።ናይ ንግዜኡ ረብሓ ግን ካብ ግዝያዊ ረብሓ ኮይኑ ፡ናይ ሱስዓት ስነ ምግባር ኮይኑ ይተርፍ።እቲ ተጨቁኑ ክነብር ዝተፈርደ ህዝቢ ግን፡ ካብ ዉሱን ግዜ ንላዕሊ ክጸሮ ስለዘይክእል ። በዓል ሓደ ከብዱን ሓደልቡን፡ ዘይጽወር ኣይጽወርን‘ዩ። ሓንሳብን ንሐዋሩን ዓወት ናይ ጭቁን ህዝቢ የንበልብል፡ ለባም ክጋገ መራግእቲ እገድፍ !!!

ናይ ዝሐለፉ ወለዶታት ፡ክልተ ዝተፍላለየ ርእቶ ኣብ ጉዳይ ሃገር ከምቲ ኣብ ላዕሊ ብሕጽር ዝበለ ከብርሆ ዝፈተንኩ፡ ናይ መን ርእይቶ ተዓዊቱ ከም ዝወጸ ተዓዚብኩሞ ኣለኹም ። እቶም ናይ ነዊሕ ራኢ ዝወነኑ ሸነኽ ሰጋኣ-መጋእ ከይበሉ ዕጥቆም ሸጥ ብምባል ናብ ዝዉንዎ ጎቦታት ሕንክዪብ ዝበሉን፡ድሕሪ ብዙሕ ሓጎጽጎጽ ድማ ዓወት ዘመዝገቡን ዘረከቡናን እዮም። ስለ‘ዚ ናይ ርሑቅ ኣይኮነን፡ ዝሰፍሐ ህዝቢ ኤርትራ ጉዳዩ ዘሰላሰለሉ፡ ኢዱ ዝሓወሰሉ ከም ምዃኑ መጠን፡ ንህዝብና ካብዚ ሕጂ ወዲቕዎ ዘሎ ምሕደራ፡ ኣልቦ፡ ካብ ኣደራዕ ከነድሕኖ እዞም ፍትሒ ነፍቅራ ኢልና ነዋጥየላ ሰባት እጃምና ንግበር ብእንኽእሎ፡ ርጡብ ቃልሲ ንምክያድ ብዙሕ ሽግር ኣይምሃለወናን ነሩ፡ ጸገምና ኣብ ዉሽጥና ኢዩ ዝርከብ፡ንሱ ድማ ንሓድነት ዘይምፍቃርና።

ተቓዋሚ ምዃን ጽቡቅ‘ዩ፡ንመሰልካ ምድላይ እታ ክትዉንና ዝግበኣካ እንኮ ናትካ‘ያ፡ ካብ ጉዪይ ምዉዓል ክሳድ ምሓዝ ዝብል ሕቶ ኣብ ዉሽጥኻ ኽገጥመካ፡ከምዝኽእል ኣቐድምካ ምርድኡ ኣገዳሲ ኢዩ።መጀመርታ ተቓዉሞ ክህሉ ቁቡል ጌርካ ምቕባሉ ንሕስያ ዘይህብ ሐቂ‘ዩ። ድሕሪ ምቅዋም ኣብ ጽኑዕ ዉደባ ምእታዉ፡ ብዘይ ንጹር ዕላማ ዓወት ዋላ እንተመጸ ከምዚ ኣጓኒፋና ዘሎ‘ዩ ዝቕበለና ዝድህኸና። ስለዚ ዉደባ ናይ ብዙሓት ክኸዉን፡ ነቲ ሕብረተሰብ ዘንጻባርቅ ዉደባታት ክህልዉ ጸጋ ሕ/ሰብና ምዃኖም እዮም፡ሃብቲ ሃገር‘ዉን እዮም።ብኸምዚ ክንርኦ እንተኽእልና ጥራይ‘ና፡ነታ ገፋሕ ጉደና ሰላምን፡ነታ ዓቐብን ቁልቁለትን ዝበዘሐ ሂይወትና ነቕስናን ብርሃን ጭራ ነሪኣን። ብንጹር ዕላማታት ምዉዳብ መተካእታ ዘይብሉ ህዝባዊ ጉዕዞ‘ዩ፡ልዕሊ 34 ዉድባት ከምዘለዋና ንዛረበለን ኣለና፡ሓይሊ ምህላዉ ኣድላይ እንድዩ እዚ ሓይሊ‘ዚ ምዉህሃድ ክፍጠር ዝግድድ ኩነት ኣብ ቅድሜና ተጋሪዱ ኣሎ።ነዚ ንምብዳህ ነብስና ምልዋጥ የድልየና ቅድሚ ኩሉ ፡ ብተስፋ ንጎልብት ።

በጃ ህዝቦም ዝሓለፉ ሰማእታት ኤርትራ ንዘልኣለም ይዘከሩ!!!

ርሑስ በዓል ልደት <> ርሑስ ሓድሽ ዓመት፡በዓል ለዉጢ2013

ዓወት ናይግድን‘ዩ፡

ሓድነት ንዉጹዕ ህዝቢ ኤርትራ፡

ዉድቀት ንሕጊ ኣልቦ መላኪ ስርዓት ኤርትራ፡

ክንዕወት ኢና!!!

ብየማነ ዘምላይ

10.01.2013